ბათუმში მცხოვრები თეა კაკაბაძე ამჟამად სასტუმრო ჰილტონის ფინანსურ განყოფილებაში, ფინანსური ასისტენტის პოზიციაზე სტაჟირებას გადის.
თეამ, სულ რამდენიმე თვის წინ, განათლების განვითარების და დასაქმების ცენტრს (EDEC) ახალი პროფესიის შეძენის და დასაქმების მიზნით მიმართა. EDEC–ის დასაქმების კონსულტანტმა შეაფასა მისი უნარები და ინტერესები, რომლის საფუძველზე, სპეციალურად მისთვის, შეიქმნა ფინანსური ასისტენტის მოკლევადიანი პროფესიული მომზადება/გადამზადების საგანმანათლებლო პროგრამა. პროგრამის ფარგლებში თეამ ბათუმში სასტუმრო ჰილტონის ბაზაზე გაიარა 200 საათიანი სასწავლი კურსი, რომელიც მოიცავდა სამუშაოზე მიმაგრებულ თეორიულ და პრაქტიკულ სწავლებას. ამჟამად 120 საათიან ანაზღაურებად სტაჟირებას ამავე სასტუმროში გადის.
„პროგრამის შესახებ მეგობრისგან გავიგე. როდესაც მეტი ინფრომაცია მოვიძიე, მივხვდი, რომ ეს შესაძლებლობა ხელიდან არ უნდა გამეშვა. დიდი ხანია საბუღალტრო საქმე მაინტერესებს. მეგობრებთან საუბრისას რამდენჯერმე აღვნიშნე, რომ ფინანსური მიმართულებით სიამოვნებით ვიმუშავებდი, თუმცა ამ საუბარს ყოველთვის მოჰყვებოდა პროფესიის სირთულეების განხილვა და სიმართლე გითხრათ ამის გამო თავს ვიკავებდი. საბოლოოდ მივხვდი რომ თუ სურვილი და საკმარისი ნებისყოფა გაქვს, ყველაფრის სწავლა შესაძლებელია“ – აღნიშნავს თეა.
ფინანსური ასისტენტის მოკლევადიანი პროფესიული მომზადება/გადამზადების საგანმანათლებლო პროგრამა განათლების განვითარების და დასაქმების ცენტრმა (EDEC) სსიპ აჭარის ავტონომიური რესპუბლიკის დასაქმების სააგენტოს (EAARA) ქვეპროგრამის „დასაქმების ხელშეწყობის უზრუნველყოფა” ქვეპროგრამა „შშმ პირთა პროფესიული გადამზადება და დასაქმების ხელშეწყობის მიზნით“ სატრენინგო მომსახურების უზრუნველყოფის ფარგლებში განახორციელა.
