სამეგრელოს რეგიონში სტილისტის მომზადება-გადამზადების პროფესიული პროგრამა დუალური პრინციპით მიმდინარეობს, რაც სამუშაოზე მიმაგრებულ სწავლებას გულისხმობს.
კურსის მონაწილეები სასწავლო პროგრამის თეორიულ ნაწილს საზოგადოებრივ კოლეჯ ,,ზუგდიდის აკადემიის“ ონლაინ ლექციების საშუალებით ეუფლებიან, ხოლო პრაქტიკული მეცადინეობები ზუგდიდის სილამაზის სალონებში გაიმართება. ასევე სალონებში გაივლიან ანაზღაურებად, სამთვიან სტაჟირებას.
პროგრამა პროექტის – „ევროკავშირი ახალგაზრდებისთვის – ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ფარგლებში ხორციელდება.
პროექტი იძულებით გადაადგილებული და კონფლიქტის შედეგად დაზარალებული ახალგაზრდების საარსებო წყაროების გაძლიერებასა და საზოგადოებრივ ცხოვრებაში მათი აქტიური მონაწილეობის ხელშეწყობას, ასევე, განათლების, დასაქმებისა და სამეწარმეო საქმიანობებში მათი ჩართვის ხელმისაწვდომობის გაზრდას ისახავს მიზნად.
პროექტი „ევროკავშირი ახალგაზრდებისთვის – ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ლტოლვილთა დანიის საბჭოსა (DRC) და განათლების განვითარებისა და დასაქმების ცენტრის (EDEC) მიერ, ევროკავშირის ფინანსური მხარდაჭერით ხორციელდება.
