ქუთაისის ახალგაზრდული ცენტრის წევრებისთვის, ბავშვთა დაცვის საერთაშორისო დღესთან დაკავშირებით გაიმართა ონლაინ სემინარი, რომლის მიზანს წარმოადგენდა ახალგაზრდების ცნობიერების ამაღლება ბავშვთა უფლებების, ბავშვთა ძირითადი უფლებების მარეგულირებელი საერთაშორისო და ეროვნული დოკუმენტების, ბავშვთა უფლებების დარღვევის ფაქტების, სახელმწიფოს
ვალდებულებების, სახალხო დამცველის აპარატის როლის, ასევე სამოქალაქო, სამართლებრივ და შრომით ურთიერთობებში ბავშვის დაცვის საშუალებების შესახებ.

სემინარის მუშაობას სახალხო დამცველის აპარატის დასავლეთ საქართველოს სამმართველოს უფროსი მადონა ბასილაძე უძღვებოდა.

ბავშვთა დაცვის საერთაშორისო დღე 1950 წლიდან მრავალ ქვეყნაში აღინიშნება და წარმოადგენს იმის შეხსენებას, რომ სახელმწიფო ვალდებულია, უზრუნველყოს თითოეული ბავშვის კეთილდღეობა, რაც გულისხმობს მათი სიცოცხლისა და ჯანმრთელობის, ხელმისაწვდომი განათლებისა და ცხოვრების სათანადო პირობებით სარგებლობის უფლებათა განხორციელებას. სემინარი ორგანიზებულია ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. პროგრამის პარტნიორია განათლების განვითარების და დასაქმების ცენტრი (EDEC).