27 წლის გვანცა თოდუა ზუგდიდში რეაბილიტაციის ცენტრში ფიზიკური თერაპევტის პოზიციაზე მუშაობს და პარალელურად თაფლის წარმოების მიმართულებით საოჯახო ბიზნესის განვითარებას გეგმავს. 

გვანცამ გაეროს განვითარების პროგრამის (UNDP) მიერ მხარდაჭერილი პროექტის „კონფლიქტის შედეგად დაზარალებული ქალების აქტივობის გაზრდა და სოციალურ–ეკონომიკური შესაძლებლობების გაუმჯობესება COVID-19 კრიზისის დროს“ ფარგლებში,  განათლების განვითარების და დასაქმების ცენტრის (EDEC) მიერ ორგანიზებულ მცირე და მიკრო ბიზნესის მართვის საკითხებზე ონლაინ ტრენინგში მიიღო მონაწილეობა.  

“ტრენინგი ჩემთვის, როგორც დამწყები მეწარმისთვის განსაკუთრებით საინტერესო იყო. მიუხედავად იმისა რომ მაქვს საოჯახო ბიზნესის განვითარებისთვის საჭირო რესურსები, არ ვფლობდი ინფორმაციას თუ როგორ დამერეგისტრირებინა ჩემი ბიზნესი, რა იყო საჭირო მცირე საწარმოს ამუშავებისთვის ან როგორ შემეძლო წარმოებული პროდუქციის პოპულარიზაცია და რეალიზაცია. სწორედ ამ საკითხებს მოიცავდა ტრენინგის მოდულები,” – აღნიშნავს გვანცა.

ტრენინგი, რომელიც კონფლიქტის შედეგად დაზარალებული ახალგაზრდა ქალებისთვის მეწარმეული უნარების განვითარებას ისახავდა მიზნად, სამეგრელოსა და შიდა ქართლის რეგიონებში ჩატარდა. მასში 44–მა ახალგაზრდა ქალმა მიიღო მონაწილეობა.