2024 წლის 3 ივლისს, საკაოს სათემო ცენტრში, დასახლების საერთო კრება გაიმართა, რომლის მიზანი იყო საკაოს თემის მოქალაქეების ჩართულობით დასახლებისთვის მნიშვნელოვანი საკითხების გადაწყვეტა. დასახლების საერთო კრების მოდელი ითვალისწინებს საკაოსა (ონის მუნიციპალიტეტი) და ცუცხვათის (ტყიბულის მუნიციპალიტეტი) მოსახლეობის მონაწილეობას ბიუჯეტირების პროცესში. დასახლების საერთო კრებაზე, საკაოს თემში რეგისტრირებული ამომრჩევლის 20% მონაწილეობდა.
მოქალაქეებს შესაძლებლობა ჰქონდათ წინ წამოეწიათ დასახლებისთვის მნიშვნელოვანი ინფრასტრუქტურულ პრობლემები და კენჭისყრის წესით მოეხდინათ მათთვის 3 ყველაზე პრიორიტეტული პრობლემის გამოვლენა.
მოსახლეობის მიერ წინ წამოწეული პრობლემები უახლოეს დროში მიეწოდება მუნიციპალიტეტის ორგანოებს (საკრებულო/მერია), იმისათვის რომ გათვალისწინებულ იქნას 2025 წლის ბიუჯეტში. დასახლების საერთო კრებას საკაოს თემის მაცხოვრებლები, სამოქალაქო საზოგადოების ორგანიზაციები და სხვა დაინტერესებული პირები ესწრებოდნენ.
დასახლების საერთო კრება ორგანიზებული იყო განათლების განვითარების და დასაქმების ცენტრის (EDEC) მიერ, ფონდ „ აფხაზინტერკონტთან“ (AIC) პარტნიორობით, პროექტის „მოქალაქეები ადგილობრივი განვითარებისთვის“ ფარგლებში.
პროექტის მიზანია ონისა და ტყიბულის მუნიციპალიტეტის ორ თემში (საკაო და ცუცხვათი) არსებული მწვავე პრობლემების გადაჭრის ხელშეწყობა, ადგილობრივი თვითმმართველობის, კერძო და სამოქალაქო სექტორის პარტნიორობით და სოფლის თემის აქტიური ჩართულობით.
პროექტი „მოქალაქეები ადგილობრივი განვითარებისთვის“ USAID-ის ადგილობრივი თვითმმართველობის პროგრამის მხარდაჭერით ხორციელდება, რომელსაც განათლების განვითარების და დასაქმების ცენტრი ფონდ აფხაზინტერკონტთან ერთად ახორციელებს.
