განათლების განვითარების და დასაქმების ცენტრმა (EDEC) საზოგადოებრივ კოლეჯთან „ზუგდიდის აკადემია“ თანამშრომლობით, შპს „მანქანათმშენებელის“ ბაზაზე, „შემდუღებლის“ მოკლევადიანი მომზადება–გადამზადების პროფესიული პროგრამის მონაწილეებისთვის, სასერთიფიკატო გამოცდა ჩაატარა.

სერთიფიცირების მიზანია პროგრამაში ჩართული მონაწილეების პროფესიული ცოდნისა და ზოგადი უნარების დადგენა და პოტენციური დამსაქმებლის დაინტერესება.

სასერთიფიკატო გამოცდა რეალურ გარემოში იმიტირებული ფორმატით წარიმართა. გამოცდა წარმატებით ჩააბარა პროგრამის 8 კურსდამთავრებულმა, რომლებიც 3 თვიან ანაზღაურებად სტაჟირებას გაივლიან.

გამოცდა მოიცავდა შემდეგ საკითხებს:

• სამუშაო ადგილის მოწყობა–მომარაგება კონკრეტული დავალების მიხედვით;
• უსაფრთხოების წესები საშემდუღებლო სამუშაოების წარმოების დროს;
• შედუღებისა და ჭრის აპარატურის გამოყენება და ნახაზითი სამუშაოს შესრულება;
• ფერადი ლითონების და კონსტრუქციების შედუღება.

პროგრამა პროექტის – „ევროკავშირი ახალგაზრდებისთვის – ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ფარგლებში ხორციელდება.

პროექტი იძულებით გადაადგილებული და კონფლიქტის შედეგად დაზარალებული ახალგაზრდების საარსებო წყაროების გაძლიერებასა და საზოგადოებრივ ცხოვრებაში მათი აქტიური მონაწილეობის ხელშეწყობას, ასევე, განათლების, დასაქმებისა და სამეწარმეო საქმიანობებში მათი ჩართვის ხელმისაწვდომობის გაზრდას ისახავს მიზნად.

პროექტი „ევროკავშირი ახალგაზრდებისთვის – ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ლტოლვილთა დანიის საბჭოსა (DRC) და განათლების განვითარებისა და დასაქმების ცენტრის (EDEC) მიერ, ევროკავშირის ფინანსური მხარდაჭერით ხორციელდება.