მაია ჩადუნელი პროფესიით ჟურნალისტია. ადამიანებთან კომუნიკაცია მისთვის უცხო არ არის, მაგრამ პატარებთან ურთიერთობის გამოცდილება აქადე არ ჰქონია. მას შემდეგ, რაც მეგობრისგან შეიტყო საბავშვო ბაღის აღმზრდელის დუალური პროფესიული განათლების სასწავლო პროგრამის შესახებ, საკუთარი ძალები ახალ საქმეში მოსინჯა.
მაია ერთ–ერთია ვინც საბავშვო ბაღის აღმზრდელის კურსზე მოსახვედრად გასაუბრების ეტაპი წარმატებით გაიარა. სწავლების თეორიული და პრაქტიკული ნაწილი სინთეზურად მისთვის საკმაოდ საინტერესოდ წარიმართა.
„მივიღე უზარმაზარი გამოცდილება. ძალიან მიყვარს ბავშვები, ყველანი განსხვავებული და თავისებურია. თვალებში ვუყურებ მათ და უკვე ვგრძნობ ვის როგორ უნდა მივუდგე, ვინ ვისთან უნდა ითამაშოს. ისინი თავად მასწავლიან ამას. გულწრფელად მიხარია, რომ ეს პროგრამა გავიარე და ასეთი სასიამოვნო სამუშაო შესაძლებლობა მომეცა.”
საბავშვო ბაღის აღმზრდელის დუალური პროფესიული განათლების სასწავლო პროგრამას, განათლების განვითარების და დასაქმების ცენტრი (EDEC) და ლტოლვილთა დანიის საბჭო (DRC), პროექტის „ევროკავშირი ახალგაზრდებისთვის – ახალგაზრდების განათლების, დასაქმებისა და ჩართულობის ხელშეწყობა საქართველოსა და უკრაინის კონფლიქტით დაზარალებულ რეგიონებში“ ფარგლებში, ევროკავშირის ფინანსური მხარდაჭერით ახორციელებს.
